Non sum qui soleat ludis electronicis oblectari, sed aliquando nuntios etiam de talibus machinis offendo legendos. Nuperrime autem nuntiatum est Microsoftianos, homines taediosiores quam ut debeant ludos curare electronicos edendos, novam huiusmodi machinam invenisse, cui nomen "XBox One."
Haec novissima machina Microsoftiana:
- non potest munere fungi sine alia machinula, "Kinect 2" dicta,
- quae ipsa semper accenditur, numquam extinguitur,
- et microphono regitur: nam lusores possunt "XBox Off" viva voce dicere, ut machina dormiat, et "XBox On" ut dormiens expergiscatur—unde patet numquam revera dormit sed semper colloquia auscultat ut illud "XBox On" deprehendat;
- et machinulis cinematographicis pro oculis est instructa,
- quibus potest ad sex hominum facies simul agnoscere et intueri;
- et cotidie ad rete universale coniungitur, ut possit documenta mittere "domum" ad Microsoftenses.
Itaque efficacissima et commodissima erit haec "XBox One" machina ad quosdam saltem delectandos. Quis igitur hanc "XBox One" machinam amet? forsitan requiras…
Quibus dictis, modo restat una res roganda: utrum velis ipse vel ipsa hanc machinam filiis tuis dare in diem Christi natalem, an pueri donum accipiant a "Sancto Nicolao" (sive "Sancto Dollaro" et "Sancta Electride") datum.