Quantcast
Channel: Verba et Facta
Viewing all 302 articles
Browse latest View live

De tabulis Eisenhowerianis

0
0
Dwight D. Eisenhower

Dwight David Eisenhower, praeses nostrae reipublicae tricesimus quartus et inter quinque tantum imperatores quinque stellis ornatos numerandus, qui altero totius mundi bello pacem in Europaeos imposuit et Germanos pacatos subiectosque ante rexerat quam creatus est primus imperator Consociationis ex Pacto Atlantico Septentrionali, erat vir me multo negotiosior, sed nihilominus efficax et plurimarum rerum capax, quod iuvat meminisse quandocumque rebus academicis obrutum me invenio. Ille enim fertur dixisse,

Res gravis raro instat, et res instans raro est habenda gravis.

Ex hoc adagio orta est ratio temporis efficaciter distribuendi quae dicitur tabula Eisenhoweriana. Nam inter has duas qualitates, quae sunt gravitas et praesentia, possumus quattuor invenire coniunctiones:

  1. Res hodie aut cras absolvendas, ut quae sint graves et statim urgeant,
  2. Res differendas, ut quae sint magni momenti sed haud praesentes,
  3. Res aliis hominibus delegandas, ut quae sint leviores sed instent,
  4. Nugas vitandas, ut quae tempus nobis terant si illis occupemur.

Eisenhower ipse aurea aetate dicitur chartam duobus lineis ad perpendiculum directis in partes divisisse quattuor, in quas partes ille disponebat quae essent cito absolvenda aut in aliud tempus differenda aut aliis deleganda aut sibi vitanda, quo celerius inveniret quae et quando et quibus modis essent facienda. Porro FranklinCovey societas Mormonensium quae res ad negotia efficacius agenda venditat (nam qui ad Mormonensium sectam adhaerent magni momenti faciunt efficacitatem) hanc Tabulam Eisenhowerianam divulgare coepit, unde inter plurimos negotiatores et negotiosos homines haec consuetudo in usum venit.

Eisenhoweriana Tabula explicata

Haec ratio nuper in mentem mihi occurrit, cum animadvertissem novam societatem negotiatorum coepisse chartas ad hunc usum paratas necnon programma ordinatrale huiusmodi vendere, et gratis licere eorum pagina interretiali eisenhower.me uti ad res agendas ordinandas. Volui ego has chartas emere quibus res meas cotidianas sic disponerem ut uno conspectu scirem quomodo esset mihi per diem progrediendum, sed illa societas videtur e pacatis Germanis constare qui non veris dollaris utuntur (ut Eisenhower ipse usus est) sed commenticiis quibusdam frustulis papyri qui Europaeis pro nummis esse feruntur. Itaque, cum difficilius esset mihi eas emere quam ipsi facere, tabulas paravi non Anglice scriptas (sicut Germani, ὡς πρέπει τοῖς τοῦ Εἰσεναύερος αἰχμαλώτοις, eas vendunt), sed Latine, quas spero fore aliis hominibus usui.


De novissimis politicorum mendaciis

0
0

Progressus temporis secum affert progressum stultitiae quae est huius anni praeconiorum politicorum insigne. Nam hae pelliculae per YouTube divulgatae hoc maxime quaerunt: ut civium memoria deleatur et succidanea mendacia pro rebus memoria dignis substituantur.

Obama enim maximam iram moveret, si quis civis Americanus posset recordari quae Obama ipse fecerit et quae ante Obamam facta sint.

Hoc praeconium formam habet praeambuli, quo res enumerantur eiusdem generis tres, quae quartae rei illis dissimlis opponuntur, unde discrimen oriatur quod argumentum tam praebeat quam probet. Tres igitur argentarii et negotiatores nomine appellantur, omnes viri fraudulenti et scelerati Viae Muralis qui malis suis dolis salutem confidentiamque debilitaverunt reipublicae: quibus opponitur Magna Avis persona Viae Sesameae, seriei televisificae publicae in usum et ad institutionem puerorum dicatae, cui Romneius in disceptatione notissime negavit se velle pergere pecuniam e fisco publico sumptam dare. Prima igitur fronte videtur hoc praeconium dicere Obamam curare fraudem in cives rempublicamque actam iusta legum vi opprimendam, Romneium vero in commune bonum damnum acturum dum argentarii solitam insolentiam perpetrent. Sed qui sunt hi primi tres scelesti?

Kennethus Lee "Ken" Lay
praefectus Enron societati negotiatorum, quae anno 2002º decoxit; septimo die mensis Julii, anno 2004º, accusatus est fraudis; anno 2006º damnatus mortuus est defectu cordis.
Leonardus Dionysius Kozlowski
praefectus Tyco societati negotiatorum; anno 2005º fraudis et peculationis damnatus est.
Bernardus Laurentius "Bernie" Madoff
delatus a suis filiis decimo die mensis Decembris, anno 2008º; proximo die comprehensus a Reipbulicae Agentibus in Rebus (FBI); duodecimo die mensis Martii, anno 2009º ipse sua libera voluntate confessus est suas fraudes.

Obama tamen electus est praeses quarto die mensis Novembris anno 2008º, deinde rite creatus est praeses vicesimo die mensis Ianuarii, anno 2009º. Kennethus autem Lay et Dionysius Kozlowski damnati erant Frutice (sive Georgio Bush) imperante, antequam Obama etiam nomen suum dedit ut candidatus fieret ad summum magistratum petendum; Bernardus Madoff delatus et comprehensus est Frutice imperante et confessus est Obama imperante. Nullo igitur modo potest Obama iuste haberi laudandus propter hos sceleratos populi Americani hostes in ius tractos et damnatos—quarum causarum gloria Frutici, si ulli summo magistratui, est tribuenda.

Nec, si attente praeconium audiveris, invenies Obamam se laudasse ob hanc causam. Sed non potuit invenire tres alios divites in ius a se vocatos, qua de causa necesse fuit gloriam Fruticis sibi furari. Immo qui de Neoeboracensium negotiatoribus Viae Muralis et eorum sceleribus adhuc curant aut recordari possunt hoc iam probe sciunt et plangunt: quod Obama semper se mollem praebebat in divites sceleratos. In exemplum potest afferri Iohannes Corzine, quippe qui fraude et malo dolo maximum damnum in multos cives fecerit sed adhuc liber sub divo ambulet sine iustitiae timore.

Immo, si volueris eos enumerare quos Obama in ius vocavit, non inter peiores argentarios et negotiatores et divites sunt exempla quaerenda, sed potius inter delatores regiminis ipsius: nam Obama imperante plures damnati sunt qui in lucem ediderunt regiminis Americani crimina quam ullo altero praeside—immo ille accusavit plures delatores regiminis quam omnes alii nostrae reipublicae magistratus una et simul congesti. Si quis voluerit huius iustitiae exemplum, inveniet in Bradleio Manning, qui multa alia documenta et scelera a nostratibus ad Babyloniam militantibus facta divulgavit. Is anno 2010º comprehensus nullum ius videbit actum ante annum 2013,º post suffragia a civibus lata et post tres annos in carcere tritos.

At fortasse nimis facile intelligi potest cur Obama maluerit mentionem facere de tribus scelestis hominibus a Fruticis causarum actoribus fraudis accusatis quam de ullis a se accusatis reipublicae deferendae.

Romneius quoque stultum novum praeconium in lucem edidit:

Summatim tota pellicula potest hoc uno argumento exprimi: Romneium effecturum ut centiens viciens centena milia (12,000,000) nova munera fiant quibus cives Americani fungantur et quaestum mereant. Quod nonnullis fortasse mirum videtur, alios tamen qui de rebus oeconomicis curam dant omnino perterret hic infaustus numerus 12,000,000. Praeses enim, quicumque electus erit, per quattuor annos rempublicam moderabitur, et singulis annis nostra respublica triciens centenis millenis (3,000,000) hominibus natis iam diu augebatur, unde consequitur ut intra quattuor annos centiens viciens centena milia (12,000,000) novorum erunt civium qui ad aetatem pervenerint qua muneribus fungantur. Numerus igitur munerum quae Romneius dixit se velle civibus parari se regnante idem est ac numerus civium qui adoleverint eodem regnante: nihil igitur discriminis exstabit inter id quod natura duce fiet et id quod Romneianis consiliis efficiatur si illa valeant. Nihil igitur promittit. Nihil faciet, nisi quod natura ipsa iam paravit.

Parum tamen de numeris arteque mathematica demographicaque veritate interest vulgi, quod rabide factioni favet aut rubrae aut caeruleae.

De Georgio McGovern

0
0
628x471

Mortuus est Georgius McGovern, pacis fautor et candidatus qui anno 1972º summum magistratum petivit et quam plurimis suffragiis victus est a Richardo Nixon scelerato homine et cruore Vietnamensium commaculato. De fine in illud bellum imponendo McGovern ipse coram Senatu anno 1970º acerbam orationem habuit, unde has sententias excerpere placet:

Unusquisque huius Curiae Senator est pro sua parte culpandus ob quinquagena millia iuvenum Americanorum ad Orcum ante iustam diem demissorum; haec ipsa Curia olet sanguinem. Unusquisque Senator est pro sua parte culpandus ob ruinas hominum in Gualterii Reed1, in Bethesdae Navali, per totam nostram terram—ob iuvenes cruribus carentes, bracchis, membris genitalibus, faciebus, spebus. Quorum mancorum fractorumque pauci censent hoc bellum esse dulce et decorum: noli coram illis contionari aut de transfugio aut de patriae honore nostratiumque fortitudine. Fortitudinis ne frustulo quidem opus est ut nos Senatores magistratusque vexillo involuti dicamus nostrates in Vietnamia esse mansuros, quia non noster sanguis effunditur: immo nos culpandi sunt ob illos iuvenes et illorum vitas et spes. Quodsi defuerimus ne finem in hoc damnandum bellum imponamus, illi iuvenes olim diras nos imprecabuntur pro nostra miserabili neglegentia qua sinamus magistratus pergere illis fungi officiis quae secundum leges moresque antiquissimos sunt Senatorum.

Quibus dictis, cum resideret McGovern, alter quidem senator (cuius nomen non memoratur) fertur ei appropinquavisse et dixisse eius verbis se graviter offensum esse: cui respondisse McGovern id ipsum se voluisse.

Talia quis potest etiam somniis alucinari Obamam Romneiumve dicentem? Immo uterque candidatus hodiernus se praebet novum Richardum Nixon:

Lectori cui memoria defecerit memorandum est Georgium McGovern fuisse factionis Democraticae, Richardum Nixon tamen Republicanae.



Georgius McGovern annos vixit nonaginta.




Gualterii Reed] sc. nosocomio.

Article 21

0
0
IMG 0087

Soroban sive abacum cum electronico ordinatro addito inveni inter res diu neglectas; et multum gavisus sum propter abacum inventum, quippe cuius ope forsitan celerius faciliusque discipulorum probationes probatiunculasque corrigere possim.

Usque tamen per multos annos pila electronica inerat, quae cum temporis progressu, ut de omnibus rebus fit variis suis modis, corrupta est et sua corruptione foedata. Qua non sine cura extracta, necesse tunc mihi fuit partes electricas purgare, ac visum est ut totum abacum purgarem. Nam globuli perforati paxillisque infixi coeperunt in locis suis haerere, et maculae caffeariae ubique sparsae abacum deformaverunt.

Sed multis diversisque rebus chemicis adhibitis subito animadverti non solum causticas pilae electricae reliquias esse ab abaco abstersas sed etiam colores mappae gossipinae, qua purgandi causa utebar, esse sublatos: nam aliquid colores ipsas et xylineum textile corrodebat.

IMG 0089

Gaudeo abacum esse tandem purgatum; nunc vero volo manus identidem lavare, ne cutis quoque corrodatur.

De arboribus Sapphicis et Floridianis

0
0

Dīves Autumnus folia arborum nunc
orbe in alterō locŭplētat aurō;
vestit at truncōs cyanī colōre
Flōridiānōs.

In aliis terris autumnali tempore arborum folia aureo colore imbuuntur; apud nos tamen non folia mutantur, ut quae semper vireant, sed ipsi arborum trunci ramique, qui contra aureos veteris orbis mores imbuuntur cyani potius floris lapidisve colore. Haec enim est Florida.

De automatis Alcaicis

0
0

Locus natandī mūnere fungitur
nōbis theātrī cōnspicientibus
  magnā arte mīmōs hōs agentēs
    automatāriam amōris artem.

De Frontonis "Tulliana conclusione" et basiis

0
0

Posterioribus litteris tuis, cur orationem in senatu non recitaverim, requisisti. At ego et edicto gratias agere domino meo patri tuo debeo, sed edictum quidem circensibus nostris proponam, cuius principium id ipsum erit:

Qua die primum beneficio maximi principis ederem spectaculum gratissimum populo maximeque populare, tempestivom duxi <e>sse gratias agere, ut idem dies

Hic aliqua sequatur Tulliana conclusio.

Frontonis epistolarum ad Caesarem 2.1

Certe primum puerili nostro menti occurrit idem quod Michael Petrus Iosephus van den Hout in commentariis ad hunc locum vicesimo saeculo exeunte scripserat de oratione numerosa Frontoni petenda:

Tulliana conclusio: a rhythmical conclusion of a period à la Cicero; see at 20,4. So concludere 215,14.

Nam quid Nemini puerulo putas carius fore quam ut aliquid subaudiatur vergens ad notissimum "illud tertio quoque sensu in omnibus orationibus pro sententia positum" esse videātur? Paeonem porro et spondeum iam invenimus in Frontonis "maximeque populāre" paulo ante dictum. Vero hanc declamatoriam stultitiam statim mente excussimus: nam clausulae nulla difficultate petuntur, nec Fronto posuisset illam trium verborum stipulam "ut idem dies" nisi ad certum quendam finem quasi rami foliorum iam mente conceptum tendebat. Immo ne nos Frontonianum illud "Tulliana conclusio" ad paeonem spondeumque vel similem clausulam spectavisse habeamus, sed Frontonem potius longiorum Arpinatis locum laudare voluisse:

ut idem dies non modo iniquissima me invidia liberarit sed etiam celeberrima populi Romani gratulatione auxerit.

Ciceronis orationum Philippicarum 2.14.16

Conclusio fortasse non inepta Frontoni.

At haec epistola non solum propter Tullianas conclusiones studium nobis movet, sed etiam propter vocabulum nullo modo Ciceronianum sed potius quam maxime Catullianum: nam in epistolae ipsius conclusione haec verba invenimus:

Tu si et valde properas, aliter te interim oblecta: basia patrem tuum, amplectere, postremo ipse eum lauda. Ceterum quidem in idus A<u>gustas tibi expectandum est ut quid vis, quale vis audias.

Vale, Caesar, et patrem promerere; et si quid scribere vis, lente scribe.

Nonnulla nuper scripta sunt de Frontone et Marco Aurelio, et praesertim propter Californiensis (etsi gens delirans est semper cavenda) cuiusdam Richilin nomine libellum "Marcus Aurelius in Love," qui a nonnullis refutabatur (quorum cito legi potest symbola Christiani Laes de osculis edita). Sed Richilin Californiensis ad quandam veritatis speciem aliquando accedit: Catulliana enim vox variis in epistolis auditur, sed fortasse magis propter eruditionem (et eruditionis faciem, quae fuerit Frontoni magistro ostendenda) quam veram libidinem adolescentis osculorum. Nobis autem studium movet illud "basia patrem tuum" non propter ullam curam περὶ τοῦ ἐρομένου τε καὶ τοῦ ἐραστοῦ, sed quia basiandi verbum temporale, raro etiam apud poetas repertum, apud auctores solutae orationis vix legitur nisi apud Frontonem.

Catullus enim a quibusdam (sed non sine controversia) primus fertur vocabulum effinxisse e "savii" nomine litteris paululo inversis, quem secuti sunt Martialis Iuvenalisque et Phaedrus, quibus omnibus est aliquid eius iambici saporis quem Catullus quoque redolet. Idem nomen substantivum non leges apud antiquos prosae orationis auctores nisi apud Petronium et Apuleium (qui tantum in Metamorphoseon libris eo usus est), fabularum artifices. Verbum autem temporale basiandi extra versus numeris adstrictos modo inveniri potest apud eosdem Petronium Apuleimque et duabus in epistolis Frontonis (2.1, 2.3). Hoc est quod non exspectaveris: basiandi verbum apud Frontonem invenire auctorem non cantilenarum sed epistolarum.

Confiteor Frontonis prosam numerosiorem esse quam ut dicere possimus eum numeris omnino carere: nam si ius elisionis semel sustuleris et siveris "tuum" ante "amplectere" positum hiare, et littera "e" in "postrēmō" corripueris ut "postrĕmō" legas, et uno oculo clauso altero lippo syllabas diutius quam lectoris compotis mentis sit intuearis, in his Frontonis verbis:

bāsiā patrem tuum, amplectere, postrĕ[?]mō ipse eum laudā

Sapphicum versum "maioris" generis cum spondeo ad finem superaddito forsitan invenias. Porro iuxta aliud basiandi verbum, quod in tertia eiusdem libri epistola reperitur, Graece scriptum legimus

Ἰσχυρῶς πάντων καταπεφρόνηκας

in quibus minorem Sapphicum inveniremus… si altera syllaba eius "ἰσχυρῶς", sicut altera eius "postremo," non esset producenda. Sed haec fiunt secundum normas oratorias, quippe per quas non liceat versum integrum ponere ne decantare potius quam declamare videaris. Nihilominus, in illis duobus locis ad Sapphicos numeros propius appropinquat oratio Frontonis, ubi ille videtur vocabula magis poetica adhibere.

Hodie tamen nomen substantivum quod est "basium" inter prima vocabula docetur, saltem a nobis qui a professoribus cogimur enchiridione uti Wheelock's vocato, quamquam discipuli nullos versus umquam pangunt, sed nihil nisi rusticos barbarismos et imparilitatem soloecismorum scribillant, si quis hypodidascalus tam crudelis et saevus est ut cogat eos Latine scribere (aut, quod summum nefas habetur, viva voce dicere) potius quam barbarismos soloecismosque eiusdem enchiridii in idioma ad Anglicum sermonem vergens vertere. Nomen autem osculi non ante tertium semestre spatium discipulis traditur, id vero savii numquam, scilicet quod verba Tulliana dedecet discere; neque illi discunt utriusque nominis cognatum verbum temporale neque etiam id basiandi.

Ad tempus terendum

0
0
Discipulis probationis periculum subeuntibus mihi est tempus terendum. Sapphice igitur, scripta est haec formula salutationis nulli puellae mittenda, nec ullo sensu venusto composita sed tantum ad numeros et, per iocum, instar "fratrum" ut vocantur nebulones qui hanc paludem infestant:

Salveas pulchre, [ibi nomen addas]!
Ut valet tua speciosa forma,
quam diu amplexu cupio tenere,
mollis amica?

De crimine adulterii et de ducibus nuper demotis

0
0

Apud Americanos saltem summa fides habetur esse ea qua maritus uxori devincitur: sine qua demonstrata nemo candidatus potest ad maiora honorum officia promoveri, neque hoc certa lege sed etiam certiori consuetudine, nam ubi consuetudo tam certe rata ducitur, nulla lex delebili atramento scripta desideratur. Unde consequitur ut maximum scelus habeatur adulterium, quia nihil publicae fidei viro committendum videtur qui non potest hanc unam et fundamentalem et privatam fidem suae carissimae debitam observare. Variis igitur in civitatibus, quamquam per temporis progressum leges saepe mitescebant, usque legibus puniendus est adulter; sed nusquam lex tales in scelestos durior saevit quam apud milites, quibus legum militarium articulum centesimum tricesimum quartum statuit non solum ut adulter ab omnibus honoribus demoveretur sed etiam ut in carcere propter dedecus tam in exercitum quam in rempublicam ipsam illatum teneretur.

David Petraeus et Paula Broadwell
David Petraeus Imperator et Paula Broadwell, quae inter alia vitam eius scribebat

David Petraeus, rerum gestarum doctoratus et quondam imperator quattuor stellis ornatus qui toto exercitui cum in Chaldaea tum in Bactria praefectus erat necnon ante diem hesternum praefuerat speculatoribus militibusque occultis qui vulgo CIA vocitantur, confessus est crimen adulterii. Agentes enim in rebus, qui FBI vocantur, suspectam habuisse dicuntur Paulam Broadwell, quippe quae sibi videretur posse Petraei epistolas electronicas, et voluisse scire quomodo et ob quam causam illa legeret epistolas imperatoris. Deprehensus igitur ipse suum scelus confessus est.

Is anno 2003º, cum praeesset Centesimi Primi legionis militibus deciduis (inter fortissimos numerandis, quippe qui de caelo sericis velis adiuvati tam ex inopinato quam in manifestum periculum descendere soleant), a militibus dicebatur esse homo affabilis, dux assiduus, vir fortis: memoratur enim eum cuidam electo militi longe iuniori et toroso se roganti quotiens posset pronum corpus humo bracchiis fretus sublevare (exercitationis genus apud milites crebrum et apta materies certaminum) respondisse se semel plus posse quam ille iuvenis posset—quod eum tunc coram multis cum illo milite certantem monstravisse esse verum. A militibus dilectus, et coronas meruit et fidem reipublicae, quam postea perdidit.

David Petraeus et Paula Broadwell

Idem testimonium coram Senatu testimonium daturus fuit de clade Cyrenaica, qua undecimo die mensis Septembris et speculatores et Christophorus Stevens legatus occisi sunt a latronibus, quamquam illi rogitabant auxilium militare sibi mittendum ut servarentur. Antea Petraeus dixerat nec se nec alios inter speculatores recusavisse quin auxilium mitteretur, sed inter septem horas nihil subsidii missum est; nonnihil igitur suspicionis omnino incertae adhuc manet in illa re.

Petraeus videtur sua sponte se a muneribus abdicavisse propter dedecus, sed nullo modo potest solus dici qui nuper amotus est: duo saltem alii duces hoc anno in actis diurnis referuntur propter scelera:

  • Geofridus Sinclair dux unius stellae, domum deductus est a Bactria tempore vernali et postea comprehensus nunc accusatur adulterii, sodomiae, pornographiae, usus temeti, dedecoris. Si damnatus erit, agit omnes reliquos suos annos in carcere militari.
  • Carolus Gaouette admirantus unius stellae, qui praefuerat aeroplanigeri classi tertiae (cuius navis principalis est Iohannes C. Stennis), demotus est ab honoribus et domum deportatus dum eius naves ad Persarum periculum navigant—rem inauditam. Causa ob quam admirantus a suis nautis abductus est non liquet, sed dicitur esse "mala ratio ducendi" quod potest quidlibet significare. Nonnulli tamen rumoribus addicti suspicantur eum cum nauta femina esse deprehensum.

Quibus nonnulli addunt et Carterum Ham ducem quattuor stellis decoratum, qui adhuc praeest omni Africanae provinciae neque auxilium misit speculatoribus legatoque in Libya trucidatis; sed militares oratores iam negaverunt eum propter illam cladem esse ab honoribus amotum, sed potius aut in aliud munus vocatum iri aut rudi donatum iri—non constat utrum fiat, et fortasse opus erit eius peritia propter tot alios aut comprehensos aut demotos. Haec tamen ad adulterium militare nihil pertinere videntur, nam nemo in suspicionem adulterii vocavit Ham illum; modo vero discere volunt nonnulli cur ipse nihil auxilii miserit nostris civibus in Libya obsessis.

Sed, ut ad argumentum principale revertamur, nec hoc crimen solum apud milites punitur: nam Christophorus Kubasik, quem multi putaverant mense Ianuario praefectum iri Lockheed Martin societati aeronauticae, nuper tamen ob matrimonii fidem violatam coactus est se muneribus abdicare, et anno bismillesimo decimo Marcus Hurd, qui praeerat Hewlett-Packard societati electronicae, idem fecit et idem passus est.

De epistola monitoria accepta

0
0

In capsella electronica hodie inveni epistolam monitoriam mihi ab Oppidulo missam de vi electrica a me adhibita, cuius argumentum brevissime exprimitur his verbis et numeris et lineis:

Vis1

Commotus igitur, ne civis satis fidelis et amator tam patriae quam capitalismi viderer, visitavi Oppiduli paginam interretialem, qua cives possunt se conferre cum vicinis, quo exactius omnes oppidani sciant qui satis consumant et qui parci avarique nostras libertates oderint. Horribile visu:

Vis2

Sciebam me animo aliquatenus demissum nuper mihi visum esse, sed hoc… non solum pigrior quam cives medii vim electricam consumebam, sed etiam infra viridos istos qui insoliti habentur, nec semel sed bis. Oportet igitur animo meliori plus consumere; fortasse debeo medicum visere qui pillulas laetificas mihi det ad amorem consumptionis fovendum, ne pergam malus videri civis etiam tempore Natalicii Christi, quo festos dies celebramus Sancti Dollari.

Mirum colloquium

0
0

Mirum in modum Paula Broadwell, discipula doctoranda et diurnaria quacum David Petraeus Sixtii filius, quondam imperator cum Chaldaei tum Bactriani belli necnon director agentium occultorum, adulterii crimen admisit, videtur mense Ianuario cum Iohanne Stewart sermocinata esse televisifice, quod spectaculum propter scelus nuper patefactum nunc videtur ineptissimum et quasi risibile, nisi quod propter dedecus magis dolendum est quam ut infaustum risum moveat.

Prima in parte huius colloquii vita tractatur quam de Petraeo conscripsit Paula Broadwell; deinde ad certamen vertitur, quo Paula provocat Iohannem ad prona corpora sursum deorsum levanda. Hoc enim genus exercitationis et certaminis apud milites est celeberrimum; Petraeus ipse fertur saepe suos milites multo iuniores sic provocasse et hoc in certamine vicisse. Sponsione autem pecuniae facta, Iohannes a Paula superatus cogitur viciens millia dollarorum dare ad societatem cuius propositum est ut vulneratos milites doceat corporibus exercendis animos quoque exercere parareque ad vitam civilem agendam. Quod magis mirum videtur: maritum Paulae adesse et cum Iohanne Stewart exerceri.

Article 13

0
0

Diurnarii Neoeboracenses, qui in Paulae Broadwell vicum descenderunt, extra domum invenerunt humi creta inscriptum hoc elogium: "Pater ♥ Matrem." Quod aut ante adulterium patefactum scriptum erat, aut nemo potest puerulis explicare Quid Mater Fecerit et cur mater fortasse multos annos in carcere agat.

Nam nuper relatum est agentes in rebus, qui "FBI" vulgo dicuntur, invenisse Paulam in ordinatro condidisse documenta occulta atque arcana, ob quae potest fieri ut ista per decem annos in carcere includatur…si in ius vocata erit (nam Bradleius Manning adhuc indemnatus sed catenis vinctus exspectat). Diligenter enim agentes in rebus debebunt eius totam vitam exquirere inspicereque, ne eveniat ut Russorum fuerit sitve speculatrix, sicut Anna Chapman quae anno 2010º comprehensa est et in gelidam vastitatem deportata unde venerat, et nuperrime Alexander Fishenko qui, una cum decem aliis, mense Octobri accusatus est speculandi.

Broadwell dicitur esse civis Americana et in Dacota Septentrionali nata, sed Russi sunt callidi et vafri mendaces, neque umquam potes satis compertum habere feminam non esse speculatricem Russicam (et praecipue feminam quae deprehensa sit cum documentis secretis et cum nostro praefecto speculatoribus).

De arce Cinderellae illuminata

0
0

Cum Irisatus carmen panxerit de festis diebus Sancti Electridis, non nimis inconcinnum videtur mentionem hic facere de Disneiensibus Floridensibus, qui hieme ad eundem beatissimum Luciferum honorandum Arcem Cinderellae, munitissimum Regni Magici locum atque inexpugnabile Muris Tyranni castellum, ornant ducentenis milibus luminum ad quadragena milia pedum quadratorum retis piscarii affixis et duodeviginti millibus passuum fili electrici roboratis, ad quod opus absolvendum vigiles assiduique opifices Murini per sex hebdomades tantummodo noctu laborant. Qui autem tam callidi sunt et magicarum artium periti ut tota arx illuminetur tanta vi electrica quantam modo tres hodiernae machinae adhibent quibus lauta madidave vestimenta siccentur.

De novissimo imperatore in dubium vocato

0
0
Gp29

Nuntiatus est Iohannes Allen, Bactriae provinciae praefectus qui creandus videbatur summus imperator Sociorum Atlanticorum, in dubium vocatus esse propter epistolas electronicas haud decoras quas fertur ad eandem feminam Tampensem misisse de qua sollicitabatur Paula Broadwell zelotypa discipula doctoranda et adultera, quacum David Petraeus fidem tam uxoris quam totius reipublicae perdidit. Iohannes negat se quidquam mali fecisse. Senatores tamen iam festinant alterum ducem praeficere Bactriae, tarde vero cessant et inquisitionem exspectant ne Allen Sociis Atlanticis praeficiatur.

Iis, qui volunt nomina ducum, aut cito aut lente a muneribus honoribusque a mense Octobri ineunte aut demotorum vel criminum accusatorum vel in dubium saltem vocatorum, quasi cuiusdam ludi puncta (aut latrunculos de tabula demotos) numerare:

  • Geofridus A. Sinclair (dux exercitus una stella ornatus, qui in Bactria provincia militaverat), accusatur adulterii, sodomiae, usus temeti, et multorum aliorum; verisimile est eum reum fore coram iudice militari, cuius sententia non erit lenis;
  • Carolus M. Gaouette (admirantus una stella ornatus, qui dum ad Persarum vicinos defendendos navigat subito demotus est et domum dedectus), ob causas iam incertas a muneribus demotus est; inquisitio tacita et tecta progreditur;
  • David H. Petraeus (imperator exercitus quattuor stellis ornatus, praefectus Chaldaeae et Bactriae, praefectus speculatorum et militum occultorum), confessus est adulterium;
  • Iohannes R. Allen (imperator militum classicorum quattuor stellis ornatus, praefectus Bactriae, creandus summus imperator Sociorum Atlanticorum), in dubium vocatur propter epistolas electronicas haud decoras;

et fortasse:

  • Carter F. Ham (exercitus dux quattuor stellis ornatus, praefectus toti Africae provinciae), qui non propter adulterium demovetur sed rite honesteque rudi donandus esse dicitur, quamquam de hac re quaedam suspicio orta est propter Libycam cladem.

Quis igitur restat qui milites imperet? Estne nunc Gomer quidam Pilus ad imperium promovendus?

Item

0
0
Guillelmus Ward

Hodiernus dux puniendus: Guillelmus Ward dux exercitus, quondam quattuor stellis ornatus, qui praefectum Europae provinciae (EUCOM) adiuvaverat, deinde ipse praefectus est Africae provinciae (AFRICOM) ante Carterum Ham. Mense Aprili, anno bismillesimo undecimo, rudi donatus est, sed prodigiae tunc suspectus, nuper accusatus: dicitur enim luxu addictus pecuniam publicam perdidisse. Una honoris stella dempta, mox cogetur octogena bina milia dollarorum reddere reipublicae.


De saltatrice

0
0

Sōlitūdinem sterilēsque montēs
torret ardenter saliēns puella:
membra nervōsque fluidōs retorquet
mōre colubrae.

De δαιφυκυμῶζι

0
0
dæfucumōchī

Tam sapōre quam viridī colōre
præditus theæ, globulus liquōre
fartus et dulcis, vocitātur aptē
大福

De Iohanne Monade, lividae strophae Sapphicae

0
0

Christus est nātus, Monas et recessit.
Christus est nātus, Monas et recessit.
Quem putāveram minus esse cæcum:
dēcipiēbar.

Dulciter canēns utinam manēret.
Dulciter canēns utinam manēret.
Chartulīs ā Iūdice sed tribūtīs
dē Monade actum'st.

Dē solēbat perpetuō loquī atque/>dē diē plus perpetuō profārī:
quæritāns sed inveniēs agī rēs
nōn ita posse.

Fausta Sāturnālia, mī Iohānnēs.
Mē relīquistis, remanēbŏ sōla:
antecellat anticipātiō tamen
omnia vēra.

Iohannes Monas, sive Iohannes Martialis Alexander minor, cantor medio saeculo vicesimo notus, die Christi natalicio anno millesimo nongentesimo quinquagesimo quarto de vita decessit. Erant qui dicerent eum Fortunam Armigeram provocasse et Russorum more manuballistam in se vertisse; alii tamen retulerunt eum manuballistam in semet ipsum collineavisse ut monstraret eam esse vacuam et innoxiam et tutum—in qua re sua temeritate deceptus fuisse videretur; alii fatebantur Iohannem superbia motum temptavisse coram feminis virum fortem videri cum prudentem semet ipsum praebere magis eum deceret. Hodie tamen pauci eius nomen umquam audiverunt, et illi tantummodo propter diem et modum mortis. De quo cantore, eiusque pistreis vestimentis et crocodileis calceamentis, videas lividam et rusticam historiam, cui inscribitur "Iohannes Monas est Mortuus."

De JR Ewing philosopho mortuo

0
0
JR Ewing

Series televisifica "Dallas" inscripta numquam erat inter optimas laudibusque dignas numeranda, sed omnes amabamus JR philosophum praeclarum, quippe qui multa commoda et utilia doceret pueros Americanos. Ex eo tempore quo desivit JR de petroleo agere, pretium benzini est ter auctum: unde scimus eius praecepta fuisse veram sapientiam. Sit tibi terra levis, JR.

Quemadmodum vertendi ars pudore suppernata dulces gradus possit lectoribus furari

0
0

Plato in Phaedro scripsit:

καὶ ὅταν μὲν ἐκεῖνος παρῇ, λήγει κατὰ ταὐτὰ ἐκείνῳ τῆς ὀδύνης, ὅταν δὲ ἀπῇ, κατὰ ταὐτὰ αὖ ποθεῖ καὶ ποθεῖται, εἴδωλον ἔρωτος ἀντέρωτα ἔχων· καλεῖ δὲ αὐτὸν καὶ οἴεται οὐκ ἔρωτα ἀλλὰ φιλίαν εἶναι. ἐπιθυμεῖ δὲ ἐκείνῳ παραπλησίως μέν, ἀσθενεστέρως δέ, ὁρᾶν, ἅπτεσθαι, φιλεῖν, συγκατακεῖσθαι· καὶ δή, οἷον εἰκός, ποιεῖ τὸ μετὰ τοῦτο ταχὺ ταῦτα. (255e)

Quem locum Marsilius Ficinus in sermonem Latinum sic vertit:

Itaque presente illo, dolere ut ille similiter desinit; absente vero desiderat vicissim desideratus, mutuum amorem tanquam amoris simulachrum possidens; nec amorem ipsum, sed amicitiam et vocat et putat. Cupit ergo ferme ut ille quamvis moderatius videre atque assidua consuetudine perfrui; et ut par est post hac protinus hec facit.

Aliquid deest. Vel, quo exactius loquar, duo gradus desunt de quattuor a Platone nominatis.

Viewing all 302 articles
Browse latest View live